Home > Navigation > Text Groups > Drama > Interludes > Specimen

Interludium de Clerico et Puella

Clericus. God te blis, mome helwis!
Mome Elwis. Son, welcum, by san dinis!
Clericus. Hic am comin to ye, mome,
Yu hel me noth, yu say me sone.
Hic am a clerc yat hauntes scole,
Y lydy my lif wyt mikel dole.
Me wor leuer to be dedh,
Yan led ye lif yat hyc ledh
For ay mayden with and schen,
Fayrer ho lond hawy non syen.
Yo hat mayden Malkyn, y wene.
Nu yu wost quam y mene.
Yo wonys at the tounes ende,
Yat suyt lif so fayr and hende.
Bot if yo wil hir mod amende,
Neuly crist my ded me send!
Men send me hyder, vyt-vten fayle,
To haf yi help anty cunsayle;
Yar for amy cummen here,
Yat yu salt be my herand-bere,
To mac me and yat mayden sayct,
And hi sal gef ye of my nayct,
So yat heuer al yy lyf
Saltu be ye better wyf.
So help me crist, hand hy may spede,
Riche saltu haf yi mede.
Mome Elwis. A, son, vat saystu? Benedicite!
Lift hup yi hand and blis ye!
For it es boyt syn and scam,
Yat yu on me hafs layt thys blam.