The Introduction:

The double sorwe of Troilus to tellen,
That was the kyng Priamus sone of Troye,
In lovynge, how his aventures fellen
Fro wo to wele, and after out of joie,
My purpos is, er that I parte fro ye.
Thesiphone, thow help me for t'endite
Thise woful vers, that wepen as I write.

To the clepe I. thow goddesse of torment,
Thow cruwel Furie sorwynge evere yn peyne,
Help me, that am the sorwful instrument,
That helpes loveres, as I kan, to pleyne.
For wel sit it, the sothe for to seyne,
A woful wight to han a drery feere,
And to a sorwful tale, a sory chere.
(Troilus, Bk. I, Vv.1-14)

Chaucer's dedication to Gower:

O moral Gower, this book I directe
To the and to the, philosophical Strode,
To vouchen sauf, ther nede is, to correcte,
Of youre benignites and zeles goode.
And to that sothefast Crist, that sterf on rode,
With al myn herte of mercy I preye,
And to the Lord right thus I speke and seye:

Thow oon, and two, and thre, eterne on lyve,
That regnest ay in thre, and two, and oon,
Uncircumscript, and al maist circumscrive,
Us from visible and invisible foon
Defende, and to thy mercy, everichon,
So make us, Jesus, for thi mercy digne,
For love of mayde and moder thyn benigne.
Amen.  (Troilus, Bk. V, Vv. 1856-69)

Specimen: Troilus and Criseyde