Home > Navigation > Anonymous Texts > Vices and Virtues > Specimen

Of sorinesse.
GIET is an oðer derne senne ðe me and mani3e oðre saule hafð beswiken. Hie hatte tristicia, þat is, sarinesse. Þes is an of ðe heued-sennes, ðeih hie dierne bie. Hie is icleped sarinesse, tristicia mortem operante, 'sarinesse deað wurchende,' for ðan hire ofþingþ of alle gode ðe a3unnen bieð for godes luue te donne. Ðes awer3ede gast, hie makeð ðane religiuse man, ðe alle woreld-þing for godes luue hafð forlaten, sari and drieri and heui on godes workes, and ofte doð ofþenchen þat he æure swo haueð idon. Al swo he deð þo men ðe sennen habbeð forhaten te laten, and swa hie doð iec ðo menn ðe habbeð gode behaten god te donne, oðer hal3e to sechen, oðer to fasten, oðer sum oðer god te donne. On alle wise he fandeð hu he mu3e gode weorkes letten, oððe mid ofðanche and mid sarinesse and unbleðeliche hes don.

Of a-solknesse. Vnlust.
ÐIES swikele senne haueð iet ane suster, ðe is icleped accidia, ðat ðad is, asolkenesse, ðe me haueð ðurh mire emeleaste manie siðes beswiken. Hie me haueð imaked heuy and slaw on godes weorkes ðurh idelnesse; hie me haueð ofte idon eten oðermannes sare swink all un-of-earned. Ofte hie me haueð idon slæpen ðar ic scolde wakien on godes seruise be daie and be nihte. Swilch hit non oðer bien ne mihte. Ðies awerede senne is on of ðe heued-sennes, and hie beswikð mucheles ðe mare ðe me of hire litel 3eme nimþ. Þat is þe ænde of ðessere senne, ðat hie wolde ðat man none 3eme ne name of him seluen, ac ðat he on slauþhe and on ydelnesse his lif ladde anon to his ande-dai3e, and ðat he herfore wurðe fordemd into helle pine. Ðis is soð, neme 3eme se ðe wile!