Pacience is a poynt, þa3 hit displese ofte.
When heuy herttes ben hurt wyth heþyng oþer elles,
Suffraunce may aswagen hem and þe swelme leþe,
For ho quelles vche a qued and quenches malyce.

For quo-so suffer cowþe syt, selde wolde fol3e,
And quo for þro may no3t þole, þe þikker he sufferes
Þen is better to abyde þe bur vmbe-stoundes
Þen ay þrow forth my þro, þa3 me þynk ylle.

I herde on a halyday, at a hy3e masse,
How Mathew melede þat his Mayster His meyny con teche;
A3t happes He hem hy3t and vche-on a mede,
Sunderlupes, for hit dissert, vpon a ser wyse.

Thay arn happen þat han in hert pouerte,
For hores is þe heuen-ryche to holde for euer;
Þay ar happen also þat haunte mekenesse,
For þay schal welde þis worlde and alle her wylle haue.

Thay ar happen also þat for her harme wepes,
For þay schal comfort encroche in kythes ful mony.
þay ar happen also þat hungeres after ry3t,
For þay schal frely be refete ful of alle gode.

Thay are happen also þat han in hert rauþe,
For mercy in alle maneres her mede schal worþe.
þay ar happen also þat arn of hert clene,
For þay her sauyour in sete schal se with her y3en.

Thay ar happen also þat halden her pese,
For þay þe gracious Godes sunes schal godly be called
þay ar happen also þat can her hert stere,
For hores is þe heuen-ryche, as I er sayde.
(Patience, Vv. 1-28)

Home > Navigation > Anonymous Texts > Patience > Specimen